হাজংগ্লৗলৗ খাৱানগ্লৗ।
কাছুৱৗ
কাছুৱৗ মাচাং বিচি ভাতদা হাজংগ্লৗলৗ আদত খাৱান।"কাছুৱৗ মাচাং বিচি ভাত" কে বাখা দিনৗ আগে গাহেনও বানাছে।কিন্তু কাছুৱৗগ্লৗ এলা কুমিছেগৗ আৰ হাৰেয়া যাবোগৗ কে মানিছে বেদেন ইদৗ বাজাৰনি নাপায়গৗ আৰ আগভায়লা যুগগ্লৗ চাতিয়ৗ চাবাগে তাল কম।
শামুক
গাং পানী বা ভুইবাৰিনি পাৱা শামুকগ্লৗও হাজংগ্লৗ খায়।দুই জাতলা শামুক আছে।একৰা হুছে গোল আৰ আৰেকৰা হুছে জং।জং শামুকৰৗ বাখাৰ হাজংগ্লৗ ভালা পায়।ইদৗ দিগি আৰ ঝৰাগ্লৗনিও পায়।
ঝিনৗই
ইদৗও বাখাৰ নাবেচায়।
কাকড়া
ইদৗ পানী গাতাগ্লৗনি থাকে।গাতাগ্লৗনি হাত তাম্রেয়া মুজুন বৗৰ কৰায়।ইদৗ খাৰ দিয়ৗও নাৰিয়ৗ খায় আৰ ভাজিয়ৗও খায়, খলাৰা নাফেলআয়কে।
লিবা শাক
ইদৗ পিদলিগুৰৗ আৰ পানী দিয়ৗ ছৗই বানায়।একন ভলা মাছগুৰৗগ্লৗও দেয়।
খাৰ
ইদৗ লৗও, কুমড়ৗ, বাঙি, কুসু, গাজা, হিদুলগ্লৗ লগে বানায়, কুলা গাছ থিকি বানানি খাৰ লগে।কুলা খাৰৰা কুলা গাছজা খোলিয়ৗ খাজাং কৰে।তানে ইদৗ ৰোদনি শুকৗ দেয় আৰ জুইনি পোৰা দেয়।তানে ছৗইগ্লৗ জমাকে মুজুন পানীনি মিসলিয়ৗ শাকে।শাকানি পানীৰৗই খাৰ।
দিং-পোৰা
ইদৗ হিজৗনি খাৱান।বিচি ভাত চৗলৰৗ পাতা ৰংলা বাংশনি ভৰায় আৰ জুইনি পোৰা দেয়। পোৰা দেৱা পাশে বাংশৰা কাটিয়ৗ খোলৗয় আৰ উদৗ চা বা দুত লগে খায়। ইদৗ কয় দিনৗ থোবা পায় বা এক সপ্তাও থোবা পায়, কিন্তু ইদৗ পুইলৗ দিনৗ বা পাশে দিনৗতে খাৱাৰাই বিচি ভালা। একন ভলা ইদৗ কয় দিনৗ থুছে, দাতিক হয়, তাৱ তুতা কুৰিয়ৗ খাবা পায়, কিন্তু সাত নাথাকে।
পিঠৗ
পাতা পিঠৗ, বাতুল পিঠৗ আৰ তেল পিঠৗগ্লৗ হাজংগ্লৗ বিচি খায়। ইগ্লৗ পুচনৗ পর্ব ভলা বানায়। পাতা পিঠৗৰৗ বিচি ভাত বা পিদলিগুৰৗ কুলা পাতানি পানী ভাবনি বানায়। তাল ৰসজা বিচি ভাত বা পিদলিগুৰৗ লগে আৰ কুলা আৰ পানী লগে মাখায়। যি ভলা আঠা-আঠা হয়, উদৗ কুলা পাতানি বানিয়ৗ কৰেয়ানি থোয়। তানে কৰেয়াৰা পানী গৰম কৰা উফুৰনি থোয়। বাটুল পিঠৗৰৗ গোল আৰ ডিমৗ চৗয়ৗ সুটু। ইদৗও পাতা পিঠৗ হেনাই কৰেয়ানি বানায়। তেল পিঠৗৰৗ তেল দিয়ৗ বানায়। পিদলিগুৰৗৰৗ পানী লগে মিলিয়ৗ আঠা-আঠা বানেয়া ৰাংথা-ৰাংথাকে তেলনি বাজে।
আগপাটা<<<
