You are here

Khawan

Hajongglâlâ Khawanglâ.

Kasuwâ Kasuwâ masang bisi bhatda Hajongglâlâ adot khawan. ”Kasuwâ masang bisi bhat” ke bakha dinâ age gaheno banase. Kintu kasuwâglâ ela kumisegâ aro hareya jabogâ ke manise beden idâ hatni napaygâ aro agbhayla jugglâ catiyâ cabage tal kom.
Hamuk Gang pani ba bhuibarini pawa hamukglâw Hajongglâ khay. Dui jatla hamuk ase. Ekra huse gôl aro arekra huse jong. Jong hamukrâ bakhar Hajongglâ bhala pay. Idâ digi aro jhoraglâniu pay.
Jhinây Idâw bakhar nabesay.
Kakra Idâ pani gataglâni thake. Gataglâni hat tamreya mujun bâr koray. Idâ khar diyâw nariyâ khay aro bhajiyâw khay, kholara naphelayke.
Leba hak Idâ pidligurâ aro pani diyâ sây banay. Ekon bhola masgurâglâw dey.
Khar Idâ lâw, kumrâ, bangi, kusu, gaja, hidulglâ loge banay, kola gas thiki banani khar loge. Kola kharra kola gasja khuliyâ khajang kore. Tane idâ rôdni hukâ dey aro juini pora dey. Tane sâyglâ jomake mujun panini misliyâ sake. Sakani panirây khar.
Ding-pora Idâ Hijâni khawan. Bisi bhat câlrâ patarongla bangosni bhoray aro juini pora dey. Pora dewa pase bangosra katiyâ khulây aro udâ ca ba dut loge khay. Idâ koy dinâ thoba pay ba ek saptaw thoba pay, kintu idâ puilâ dinâ ba pase dinâte khawaray bisi bhala. Ekon bhola idâ koy dinâ thuse, datik hoy, taw tota kuriyâ khaba pay, kintu sat nathake.
Pithâ Pat pithâ, batul pithâ aro tel pithâglâ Hajongglâ bisi khay. Iglâ pusnâ porbo bhola banay. Pat pithârâ bisi bhat ba pidligurâ kola patani pani bhabni banay. Tal rosja bisi bhat ba pidligurâ loge aro kola aro pani loge makhay. Je bhola atha-atha hoy, udâ kola patani baniyâ koreyani thoy. Tane koreyara pani gorom kora uphurni thoy. Batul pithârâ gôl aro dimâ câyâ hutu. Idâw pat pithâ henay koreyani banay. Tel pithârâ tel diyâ banay. Pidligurârâ pani loge miliyâ atha-atha baneya rangtha-rangthake telni baje.