Bissâs kora pal:
Bisrâ-bisri kuriyâ, elaw ek say Hajong Girjâ pase, jidâ Sangkurpur gawni ase, Assamla Dhemaji oncolni. Ey girjâni 53 jhon câyâ bisi bissâs kora mân ase aro ey girjâni ek jhon Hajong mane dewsi hoya kam kore. Aro Biswanath Chariali jagani 3 ghor bissâs kora palglâ (9 jhon) ase aro Lakhimpur townni 1 ghor bissâs kora pal ase (3 jhon).
Arunacal Pradeshni 4 bissâs kora palglâ ase.
Meghalayani Shillongni, 1 ghor bissâs kora pal ase (5 jhon), aro bhatarra Bangali girjâni dhupdhuri kam kore. Turani 8 ba 9 jhon ase.
Turala baharni 7 ghor bissâs kora pal ase. Ek jhonda Garo girjâni dewsi hoya kam kore aro ek jhon Garo girjâni dhupdhuri kam kore. Aro kumayba-kumayba ase hum, jala beden âmâglâ khobor nâypay. Assamla simnây-simâyni Tikrikillâ 3 bissâs kora palglâ ase.
Bana gora:
Hajongglâ khob tamte bana goraba jowa pay. Toge Hajongglâlâ bhiturni thakibâ laga hule, toge nâybhiyânte bana gorala sopdote ghum thiki uthibâ lagibo. Jati hisâbe, timâglâhe bana gorara caban, kintu ela morodglâw nijâlâ pet palibâge bana goray. Uglâlâ bakhar homasglâ boy pora ghor bhay jalew, boy pora sâr dewa timâglâ nijâlâ mawglâge bana gorani hatapatike dey. Aro dewa bhola oy nijâlâ ghor mânglâge calay aro ingkâke jug-juglâ hikâglâ baseya rake.
Duklâ kota, basiyâ thakibâge bakhar teka kâmây kurbâ napay beden bana goraba pawa mânglâ kumibâ dhurise. Aro jinis kinibâge aro tat bohabage khob teka lage bedeno kumibâ dhurise. Sorkar thiki kom teka diyâ jinis palew, jinisjâ bisi bhala nahoy. Ela bana gora mânglâ bakhar jhone hâjrâ husegâ. Bana goraba pawara ag bhayla mânglâ payte thakibo na nathikibo ke pora-lekha thaka cengraglâ cintâ kore. Bana gora mânglâ bakhar teka deba napay beden nijâlâ pet palibâge town bhay luribâ dhurise. Bakhar jhone cakor hoya pet pale. Kunbâglâ kopal bhalate alga jatiglâ nijâlâ jatilâ kapur gorabage rakhe aro mase-mase dormaha dey.
